Nagapabilin nga solid. Ini ang pahayag nanday Governor Eugenio Jose Lacson kag Vice Governor Jeffrey Ferrer sa ila nga pag-updanay kag coalition sang grupo sa tunga sang magkatuhay nila nga mga panindugan sa May 2022 elections.
Karon nga political season, suno sa gobernador indi malikawan ang paghaboy sang intriga gani sa mas temprano pa gina tapna na nila ini.
Suno kay Vice Governor Ferrer naga pabilin siya nga loyal kay Governor Lacson kag ginhimutig ang mga naga gwa nga sugilanon nga bayaan niya si Lacson sa ikatlo nga termino sini kay maga papili siya bilang gobernador.
Suno sa kay Ferrer humalin sang nagligad pa kag tubtob sa palaabuton, tandem sila kag patapuson niya si Lacson tubtob sa third term sini.
“He is my tandem. I am loyal to him as a governor. He performs in the province of Negros Occidental with 99 percent grade”, suno kay Ferrer.
Nag panawagan man ang duha ka mga matag-as nga opisyales sa ila nga mga suporter nga padayon itib-ong ang ila nga pag-updanay kag respetuhon ang ila nga mga desisyon kag napili nga suportahan.
“We are making it clear that as far as the local coalition in the province is concerned, we remain solid. We will not allow the presidential election to break this coalition”, suno kay Lacson.
Likawan na ang habuyanay sang malain nga sugilanon kag mapatuman ang high level campaign. Bukas ang Negros sa sin-o man nga kandidato suno sa ila. Si Lacson ang naga suporta kay Vice president Leni Robredo kag si Ferrer naman kay anay Senador Ferdinand Marcos, Jr. Suno kay Lacson dapat nga i-enjoy sang publiko ang kampanya. Kasubong ini sang pista.
“Enjoy this season of politics. We will have freedom. We will respect the freedom of choice”, suno kay Ferrer.
Samtang, wala sila nga duha sang opening salvo sa local campaign kag maga depende na sa alkalde nga maga imbitar sa ila. Ginkumpirmar naman nila ang padayon nila nga pag suporta kay Bacolod mayoral candidate Albee Benitez.