Kahapon gin paidalom na sa state of calamity ang Canlaon City sa Negros Oriental kag banwa sang La Castellana sa Negros Occidental bangud sang volcanic eruption.
Ginsiling nanday Mayor Jose Chubasco Cardenas sang Canlaon City kag Rhummyla Nicor-Mangilimutan sang La Castellana nga ang ila nga pag deklara sang state of calamity ang magatugot sa ila sa pag responde sang nagakaigo sa epekto sang paglupok sang bulkan Kanlaon.
Sa Canlaon City lima ka mga barangay ang apektado kag may mga evacuees. Indi magnubo sa 23,000 ka mga pumuluyo ang na-apektuhan sa paglupok sang bulkan.
Suno naman kay Mayor Nicor -Mangilimutan sila ang naga pakig-angut sa Department of Trade and Industry agudto makapasiguro sang pag patuman sang price freeze.
Sa interview sang media sa DTI kaina sang aga sila ang nagahulat pa sang kopya sang amo nga deklarasyon para makapatuman sang price freeze.
Suno sa alkalde, ang face mask sa banwa ang gina baligya karon sa 4 pesos ang bilog nga sang tion nga wala pa naglupok ang bulkan 50 pesos ang baligyaanay sang box nga kun isipon mas barato sang sa 4 pesos nga presyo ang kada panid.
Mga talamnan sa duha ka mga LGU ang apektado man sang paglupok sang bulkan. Suno kay Nicor-Mangilimutan indi pa nila mapat-od kun ano ka lapad sa mga talamnan ang na apektuhan.
Nagmando man ang alkalde kahapon sang suspension of work sa government offices kag agencies sa banwa sang La Castellana bangud sang paglupok sang bulkan magluwas na lamang sa yadtong may kaangtanan sa delivery sang basic health services, disaster preparedness kag iban pa gid nga labing importante nga mga serbisyo.
Gina haylo man ang suspension sang trabaho sa mga pribado nga organisasyon pero ini ang yara na sa discretion sang mga pamunuan.