Siudad sang La Carlota ang Zero Open Defecation certified na. Samtang, bag-o nga wing sa Don Salvador Benedicto Memorial District Hospital ang gin inagurahan.
Ang pagkilala sa Zero Open Defecation ang ginhatag sang Department of Health kag probinsya sang Negros Occidental.
Upod man diri ang 100,000 pesos nga cash incentive.
Suno kay Negros Occidental Governor Eugenio Jose Lacson, isa ka significant nga bagay ang paglab-ot sang Zero Open Defecation nga estado bangud paagi sini mapasiguro ang pag angkon sang matinlo nga tubig.
Indi ma negar suno kay Lacson, nga ang pag pamuhin sang mga pumuluyo labi na ang yadtong wala sang mga banyo ang masami gina patuman sa mga kampo ukon suba nga isa man sa rason nga naga ka contaminate ang tubig nga naga apekto sa ikaayong lawas.
Suno kay La Carlota Mayor Rex Jalandoon malawig man antes malambot ini sang siudad.
Ginsugdan na ini antes pa man siya nagpungko bilang alkalde.
Ang daku nga pag panghangkat suno sa iya amo ang pamatasan sang tawo, ang bulig kasubong sa mga pag pamutang sang mga banyo ang mahapos lang.
Sarang masunod sang iban nga LGU ang model sang La Carlota suno kay Gov. Lacson.
Ang banwa sang San Enrique ang masunod nga target para sa zero open defecation.
Samtang, gin-inaguran man ang bag-o nga wing sa Don Salvador Benedicto District Hospital sa siudad kaina.
Suno kay Mayor Jalandoon 4.8 million pesos ang gin donate sang siudad para sa lima ka mga pribado nga kwarto nga sarang magamit sang mga pumuluyo lamang sang La Carlota.
Suno kay Dr Girlie Pinongan, ang pamuno sang Hospital Operations Department bangud sang kakulang sang mga hospital rooms kag beds gina haylo gid man nila ang mga LGU kun sa diin napahamtang ang ospital sang probinsya nga mag hatag para man nga may ma gamit ang ila constituents.