Suportado sang Negros Occidental ang pito ka mga department heads kag empleyado nga ginpasakaan sang reklamo sa Ombudsman angut sa pag hire sang 23 ka mga job order workers nga taga Bacolod City.
Suno kay Negros Occidental governor Eugenio Jose Lacson yara ang probinsya sa likod nanday provincial administrator Rayfrando Diaz kag 6 ka iban pa matapos ginreklamo sa Ombudsman sang duha ka mga persona sang Technical Malversation of public funds kag pagsupak sa Anti Graft ang Corrupt Practices Act lakip man administrative charges.
Suno sa gobernador, kun mapat-od nila nga ini ang politically motivated, ila nga ipakita kun sin-o ang mastermind ukon ang yara sa likod sini.
Sa karon wala sang may gina tumod ukon gina basol ang probinsya.
Damlag pa ginsiling na ni Diaz nga isa ka political harrassment ang amo nga lihok.
Ang abogado sang duha suno kay Diaz amo man ang abogado nga naga uyat sang disqualification case batuk kay Mayoral Candidate Albee Benitez.
Ginreklamo sang duha ang pag-hire sang probinsya sang mga taga Bacolod kag nag-alegar nga ang 23 ka JO workers mga election operators ni Benitez.
Wala man sang layi nga nagadumili sa Negros occidental sa pag hire sang mga taga Bacolod kag ang mga natungdan naga trabaho bilang mga contact tracers suno sa provincial administrator.