Ang kakulang sang personnel ang isa karon sa pagpanghangkat nga gina atubang may kaangtanan sa pagpatuman sang rapid antigen testing sa mga banwa kag siudad.
Suno kay Negros Occidental Governor Eugenio Jose Lacson ini natungod nga may gina patigayon man nga mga vaccination program sa mga kabanwahanan kag siudad rason nga natunga ang mga personnel nga naga serbe.
Suno kay Lacson, may mga lugar nga tungod may vaccination program man, nagakulang ang frontliners rason nga naga hinay ang dalagan sang rapid antigen testing nga ang tinutuyo mas mapadasig kuntani ang pag locate sang mga nag positibo sa virus angut sa contact tracing.
Gindayaw naman ang banwa sang Pontevedra bangud sang maayo nga sistema sa pagpatuman sang rapid antigen testing.
Suno kay Mayor Jose Maria Alonso may isa sila ka team nga gin pain para sa bakuna kag lain pa gid nga team sa pagpatigayon sang rapid antigen testing. Sa 87 nga gin test sa Pontevedra sang Sabado, dose ang nag positibo sa virus.
“Favor gid ko ya nga amo sini kay in a short time ma obra namon ang tanan nga olobrahon namon. At least indi na ta maghulat pila ka adlaw, ang possibility bala nga mang laton pa sila, malayo layo”, suno kay Mayor Alonso.