Dead on the spot ang kindergarten pupil matapos mabungguan sang dump truck sa dalan nga sakop sang Hacienda Manaloto, Barangay Matab-ang, syudad sang Talisay sang kahapon.
Suno kay Lt. Col. Salvador Trono Jr., hepe sang Talisay City PNP, bag-o lang gid nakapanaug sa tricycle gikan sa eskwelahan ang 5 ka tuig nga bata nga babaye upod ang iya menor de edad nga magulang, sang gulpi lang naglabay ang dump truck kag nabungguan ang bata.
Sa tabok pa sang dalan ang balay sang biktima.
Gikan ang dump truck sa Barangay Concepcion kag may karga ini nga bato kag balas.
Nagpalagyo ang driver kag ginbilin ang truck sa lugar sang insidente.
Apang, sa follow-up operation, suno kay Trono, nadakpan ang driver sang truck. Ugaling, siya ang gin-release subong nga adlaw, matapos mag-lapse ang reglementary period sang iya detention.
Nagaplano naman ang pamilya nga magpa-areglo na lamang kag indi na magpasaka sang kaso batuk sa driver.
Nagpahanumdom ang hepe sa mga driver sang truck nga maghinay lang sa pagmaneho, kag sa mga tricycle driver nga kun pwede idul-ong nga safe ukon sa lugar nga indi na kinahanglan magtabok ang ila mga pasahero, ilabi na ang mga estudyante.
Nagpanugyan man siya sa mga ginikanan nga updan gid ang mga kabataan sa pag-commute agud mapasiguro nga safe kag secure sila nga makapauli sa ila tagsa ka mga balay.