Katapo sang media nga nagpasaka sang reklamo kay Mayor Albee Benitez kag 17 ka iban pa napa panindugan nga indi pamulitika ang iya pagpalab-ot sang reklamo sa Ombudsman.
Ginpanginwala ni Roger Ledesma ang mga alegasyon nga may yara sang mga persona sa likod sang iya pagpalab-ot sang reklamo sa Office of the Ombudsman – Visayas batuk sanday Mayor Albee Benitez kag 17 ka iban pa.
Ini may kaangtanan sa iya gina-alegar overpriced nga pagbakal sang 74 ektariya nga duta sang pamilya Ledesma sa Barangay Granada.
Nanindugan siya nga indi pamulitika ang iya tinutuyo, taliw-as sa nangin pahayag sang mga respondent sa kaso ilabi na karon nga nagahilapit ang pagsugod sang local campaign period para sa natalana nga May elections.
Nakahanda man si Ledesma sa ginapaabot nga counter-charges gikan sa kampo ni Mayor Albee nalakip diri mga incumbent city councilors nga nagapapili upod sa alkalde. Ginpaathag na sang alkalde nga nag-agi sa legal process ang pagbakal sang duta sang siudad para sa ginapatuman nga landbanking program.
Tuyo sang Bacolod LGU nga mapatindugan sang housing project ang nabakal nga propiedad lakip na ang ginakabig pinakadako nga animal shelter sa pungsod kag iban pa nga infrastructure projects.