May 33 ka mga dengue cases ang na-record sa Bacolod kun diin isa ang napatay sandig sa record sang Bacolod City Epidemiological Surveillance Unit sa bulan sang Pebrero.
Suno kay Dr. Grace Tan, pamuno sang City Health Office Environment Sanitation Division, may pagnubo ini nga 19.5 percent kun ikumparar ang 41 ka mga kaso sang dengue kag may duha ang napatay base sa record sang Pebrero sang nagligad nga tuig.
Ang Barangay Singcang-Airport, Mansilingan, Granada, Cabug kag Mandalagan ang pila lang sa mga barangay nga may mataas nga dengue cases.
Samtang, may isa man ka 48 anyos nga lalaki sa siudad ang napatay bangud sang leptospirosis matapos nag-ubog sa baha tuga sang Bagyo Odette sa Kabankalan City.
Padayon ang mabaskog nga kampanya sang CHO sa publiko angut sa pagpanglimpyo sang palibot, pagpanagtag sang insecticides kag pesticides agud to mapahagan hagan ang kaso sang dengue kag leptospirosis sa kabarangayan sang siudad.