Gina paabot nga maga dangat sa 350 million pesos ang balor sang kahalitan sa katubuhan tuga sang pag pang atake sang RSSI ukon ang peste sa tubo.
Ini suno kay David Andrew Sanson ang pamuno sang task force kag Sugar Regulatory Administration Board Member nga nagsapol man kay Negros Occidental Governor Eugenio Jose Lacson Biyernes sang aga.
Paathag ni Sanson, malapit na sa 3,000 hectares sang katubuhan ang na igo sang red striped soft scale insects nga ang epekto sini naga panubo sa tubtob katunga sang sugar content sang apektado nga tubo sandig man sa Egypt study.
Ang 3,000 hectares kun ibase suno sa iya sa national production average ang sarang makahatag sang 700 million pesos nga balor sang sugar production.
Ang projected losses nabase sa reported kag validated infestation pero naga pati ang SRA nga mas malapad pa gid ang nahalitan nga area.
Iya gintalakay kay Governor Eugenio Jose Lacson ang damlag pa hinyo nila nga mag declare sang state of calamity para makapatuman sang emergency purchase sang insecticide bilang sabat sa pag tapna sang makahalalit nga RSSI.
Indi man malab-ot sa 30 percent nga kahalitan para tigayon maka deklara sang state of calamity gina lantaw kun ang balor sang kahalitan nga matuga sang peste sarang mangin basehan sa amo nga deklarasyon.
Suno kay Lacson ini ang iya nga ipatuhoy sa Provincial Legal Office para matun-an.
Suno sa SRA wala sang pondo nga gina paabot ma release sang LGU sa amo nga state of calamity nga declaration.