Nakibot ang isa sa mga empleyado sang isa ka motor parts store sa Gonzaga Street kaina mga las otso y medya sang aga kun ngaa naga balabag sa parking area nila ang isa ka Wigo.
Nakita nila ang post sa Facebook nga missing gale ang amo nga awto kay ginkawat gani nag tawag sila gilayon sa PNP.
Ang awto ang gina panag-iyahan sang isa sa mga tag iya sang sini nga store sa Barangay Alijis sa Bacolod. Suno sa amay sang isa sa mga tag iya nga si Ariel Ledesma, nanugid sa iya ang iya anak nga gin sulod sila sang tatlo ka mga lalaki nga armado sang pusil mga ala una kaina sang kaagahon. Nagpakuno kuno kuno ang isa sa ila nga customer kag dugay dugay nag deklarar na nga hold up.
Naga pang deliver sang pagkaon ang negosyo sang iya anak kag sang nobya sini.
Sa tatlo ka mga suspek, isa ang may edad na kag ang duha mga huben pa base sa panugiron sa iya sang iya. Ginpang kuha ang ila nga mga cellphone kag relo pero ila na mutikan nga naga kurog kurog pa ang isa sa mga suspek samtang ginapauba sila sang relo.
Sa pag palagyo gin gamit sang isa sa mga suspek ang awto sang nobya sang anak ni Ledesma. Ang motor sang isa ka naga trabaho sa food delivery services ang ginbitbit man sang mga suspek. Wala man nila ginpang tandog ang mga biktima.
May CCTV footage nga gin review ang mga katapo sang Police Station 7 kaina sang aga. Medyo malayo ang kuha sang video pero didto nila natukiban nga didto nag tabuay sa may dalan
Gonzaga ang mga suspect. May salakyan nga dala ang isa sa ila, ang nagdrive sang kinawatan nga wigo kag motorsiklo didto nanaug kag nag sakay sa salakyan sang isa nila ka upod.
Ang problema lang suno sa deputy commander sang Police Station 7 nga si Lt. Ramie Sayson kay indi athag ang kuha sang CCTV.
Ginbuksan ang awto sang biktima… Didto nakit-an nga naga kinay-ag ang iya nga mga pagkabutang pero ang iya laptop wala makuha sang mga suspek.
May ginapang check pa gid ang mga pulis nga dugang nga mga CCTV footages sa lugar agud makilala ang mga suspek.