Problema bahin sa kakulang sang classroom ang wala mabatyagan bangud sang gina patuman nga shifting sa klase.
Pero suno sa DepEd Negros Occidental Division, na mutikan nila ang vacancy sa mga manunudlo bangud may mga nag resign para mag trabaho sagwa sang pungsod.
May kakulang man sa classrooms, pero kay tungod nga gina patuman subong ang shifting sang klase kasubong sang pag pain sa set A kag set B sang mga klase kag gin schedule sa nagkalain lain nga adlaw, indi lubos nga nabatyagan ini, suno kay Negros Occidental DepEd Division PIO, Ian Arnold Arnaez.
Pero mangin lain naman ang sitwasyon sa Nobyembre kun ipatuman na ang full face to face classes.
“Indi pa mabatyagan ang shortage of the classroom. Pero eventually kun ipasulod na gid tanan, 100 percent in-person, medyo may problema gid kay indi ma implement ang physical distancing per classroom especially for the big schools”, suno kay Arnaez.
Pero, sa pila ka mga eskwelahan subong suno kay Arnaez may mga vacancy sa mga manunudlo. May mga nag resign tungod nga maga trabaho na abroad. May pag bakante man dala sang retirement.
“Damo ang naga bakante kay tungod galinakat ang maestra sa America subong. Tag lima ka vacancies subong kay gin resingan sang mga maestra kay manuglupad na dason semana.
Sa subong ga problema ang iban nga principal pero not in all schools, many of our schools nga may amo na nga cases kay tungod gulpyada nag linakat ang maestra plus pa wala labot sa retirables” suno kay Arnaez.
Sang Agosto 22 man nagtapos ang submission sang application para sa sini nga mga position kag suno kay Arnaez gina tinguhaan sang DepEd nga ang kakulang ang gilayon nga ma solusuyonan.
Tubtob sa karon, gina batun sang mga eskwelahan ang mga late enrollees magluwas na lamang sa mga eskwelahan nga puno na gid kasubong sang Negros Occidental High School.
Kun pila gid ang naka pa enroll para sa School Year 2022-2023 sa Oktubre pa ini mapat-od.