Nagsaka sa 97.2 million pesos ang kahalitan sa pananum sa Negros Occidental dala sang Habagat kag epekto man sang Bagyo Crising, Dante kag Emong.
Sa report sang Regional Disaster Risk Reduction Management Council, may 88.7 million pesos man nga kahalitan sa infrastructure sa Negros Oriental.
Sa July 28 nga report sang RDRRMC, naka saad nga tatlo ang gin-report napatay dala sang malain nga panahon.
Suno kay Office of the Civil Defense Regional Director, Donato Sermeno, III, ini ang naga lakip sang duha nga napatay sa Binalbagan kag sa Himamaylan.
Taliw-as sa report sang Provincial Disaster Risk Reduciton Management Council wala nalakip sa report sang RDRRMC ang duha ka patay sa Hinoba-an bangud sang pag ka kuryente kag ang mangingisda sa Sagay nga na missing matapos mag palawud kag nasapwan na lamang nga patay.
Suno kay Sermeno ang tatlo ka mga kaso ang wala nila ginakabig nga related sa epekto sang natungdan nga mga weather disturbance.
Samtang ang mga kahalitan sa infrastructure nga 88.7 million pesos suno sa iya naga tumod sa mga nag kalaguba nga classroom sandig sa report sang DepEd sa Negros Oriental.
“As of today, pero kun may mag sulod pa gid (damage report), sige pa man amon update. Sa infra 88,713,000 pesos.”, suno kay Sermeno.
Wala sang report naman bahin sa kahalitan sa infrastructure sa Negros Occidental nga gikan sa Department of Public Works and Highways.
May 454 naman ka mga balay ang partially damaged kag 53 ang destroyed.
Bahin sa kahalitan sa pananum suno kay Sermeno ang 97.2 million pesos nga losses naga tumod sa 3,586.3 ka ektarya sang talamnan kag may 4,882 ka mga mangunguma nga apektado.
32.8 million pesos naman ang balor sang assistance nga na release, 32.5 diri sa Negros Occidental kag 306,830 sa Negros Oriental.