Base sa 24 oras nga monitoring sang PHIVOLCS sa bulkan Kanlaon, nagdiutay na ang mga pagtay-og sa bulkan.
May napulo ka mga pagtay-og nga na record sang Martes, mas manubo kun ikumpara sa Lunes nga adlaw nga yara sa 20 kag nagdangat sa masobra isa ka gatus sang nagligad nga semana.
Yara naman sa masobra sa 1,200 ka tonelada ang kadamuon sang sulfur dioxide nga ginbuga sang bulkan.
Sang Lunes may 3 ka LGU nga nag report nga nag panimaho ang asupre sa mga upper barangay sa Bago kag La Carlota City kag bilog nga banwa sang La Castellana.
Naglab-ot naman sa 1,200 metros ang kataason sang ginasungaw nga aso kag abo sang bulkan.
Ginpaathag man sang PHIVOLCS nga indi banaag ukon crater glow ang nakita sa bulkan sang Martes kundi super heated plume ukon ang mainit nga gas nga gina buga sang bulkan nga kuha sang infra red camera ukon heat sensitive cameras kag indi makita sang mata sang tawo.
Nagapabilin sa gihapon sa Alert Level 2 ang Kanlaon, indi pwede makasulod sa 4km permanent danger zone.
[sibwp_form id=1]