Election Officer sang Kabankalan City ang nag-resign sa pwesto.
May bag-o naman nga Election Officer ang La Carlota City kag Himamaylan City.
Suno kay Provincial Elections Supervisor, Ian Lee Ananoria, nag-resign sa pwesto sini lamang nga Enero si Atty Jona Cabanilla bangud sang personal nga rason.
Nagbulos sa iya bilang OIC ang pinaka senior nga election assistant sang Kabankalan nga si Anna Liza Edral.
Sang ginpatigayon ang Barangay and SK Elections ginpaidalom sa pagpangusisa ang Kabankalan Comelec kasunod sang hiring sang 660 ka BSKE support staff nga wala ginatugot sa BSKE.
Suno kay Ananoria kasunod sang resignation ni Cabanilla mahimo nga wala ang administrative nga aspeto sang kaso pero sarang maga pabilin ang civil cases.
Dugang pa ni Ananoria, sa personal nga kapasidad ni Cabanilla iya ginbayaran ang mga gin-hire sang tig 2,000 pesos.
Ang honorarium nga dapat mabaton sang isa ka support staff 5,500 pesos suno kay Ananoria.
Upod sa Himamaylan nga nag hire man sang 221 ka BSKE support staff pending ini sa Comelec en banc suno kay Ananoria.
Samtang, bag-o nga Election Officer sang Himamaylan si Atty Keinth Horario, balik naman bilang elections assistant ang nag serbe sadto nga OIC nga si Romeo Palma.
Bag-o man nga election officer sang La Carlota si Atty Johnnie Lou de la Cerna.