Drayber sang traditional jeepney nga nakuhaan sang video nga nag-beating the red light gin-multahan.
Sa naglapta nga video sa social media makita ining depasahero nga jeep nga nagrekta tabok sa intersection sang Burgos Street kag Gatuslao Street bisan red-light pa ang makita sa traffic lights sang nagligad nga Pebrero 20.
Ginpangita sang Bacolod Traffic Authority Office ang amo nga salakyan tubtob nga napat-ud ang drayber nga gin-issuehan sang citation ticket angut sa disregarding traffic lights kag reckless driving.
Ginpahayag ni BTAO Deputy Jose Antonio Robello nga ila ginmultahan sang P300 ang drayber kag ginpaidalom sa seminar bangud peligroso ang iya ginhimo ilabi na sa iya mga pasahero.
Makaduha na ini ka beses nga natigayon nga natagaan aksyon sang BTAO ang kasubong nga traffic violation sa bulig sang social media.
Gani ginaduso ni Robello nga dapat kuntani pasakaan ang multa batuk sa mga violators agud mas matagaan sila sang leksyon.
Nagapasalamat man siya sa mga netizen nga nagabulig agud matapna ang mga kasubong nga bayolasyon.