Amat-amat na nga ginaplastar sang mga concessionaires ang ila mga kiosk sa palibot sang Bacolod City Public Plaza kaina sang aga, bilang pagpanghanda sa pagbukas sa Huwebes, Oktubre 1.
Ginsiling ni Christopher Mallo, Food Park Manager, nga isa sa mga ginhandaan nila amo ang pagkolekta sang mga basura kada magsira ang mga kiosk kun aga.
Nagpasalig man ang ISWIMS sa organizers nga mangin regular ang ila nga paghakot sang basura sa mga kiosk sa plaza kag Bacolod City Government Center agud mapabilin ang katinlo sang palibot para sa selebrasyon sang MassKara Festival.
Ginmanduan na ang mga kiosk owners nga kada las 3 sang aga antes sila mag sira, ila ibutang sa atubang sang ila kiosk ang mga basura agud hakuton sang ISWIMS.
Kinahanglan man nga may tatlo ka garbage bins ang tagsa ka kiosk agud ma-segregate ang basura. Painon ang mga sticks, plastics kag dry materials, kag pain man ang bulutangan sang food waste.
Ginadumilian man ang mga owners nga maghugas sang mga kinan-an sa ila nga kiosko. Ini agud malikawan nga magbaho ang lugar suno kay Mallo.
Kutob sa magalapas sa mga pagsulundan sang organizer, pagahatagan sang warning kag matapos ang ikatatlo nga warning, ipasira na ang kiosko.
May masobra sa 90 ka mga kiosko ang yara sa plaza samtang may masobra pagid 90 sa palibot sang BCGC.
Sa karun may tatlo nalang ka kiosk ang bakante sa duha ka festival sites. Maga-operate ang ini nga mga kiosk sumugod Oktubre 1 tubtob Oktubre 19 kada las 3 sang hapon tubtob las 3 sang aga.
[sibwp_form id=1]