K5 News FM Bacolod photo
Sa ginpatigayon nga operation sang PNP upod ang Mines and Geosciences Bureau sa isa ka iligal nga quarry operation sa Hacienda Bag-o, Barangay Crossing Magallon sa banwa sang Moises Padilla sadtong Agosto 25, naaktohan sang otoridad ang pito ka mga indibidwal nga nagakuha kag naga karga kag naga-transport sang balas, graba kag bato gamit ang mga heavy machinery.
Apang napaslawan sila nga magpakita sang permit kag authorization sa idalom sang Philippine Mining Act.
Nakumpiskar ang isa ka Longking nga backhoe, apat ka dump trucks kag iban pa nga quarry materials, tanan nagabalor masobra P16 Million.
Nakit-an didto nga ang isa sa mga truck nga na-recover ang may logo sang Department of Agrarian Reform.
Paathag ni Martin Cabrales, public information officer sang Department of Agrarian Reform-Negros Occidental nga red plate ang nasambit nga truck bangud iya ini sang DAR apang madugay na ini nga na-award sa Agrarian Reform Beneficiary Organization sang General Malvar Agrarian Reform Cooperative sa Brgy. General Malvar sa banwa sang Pontevedra sadtong 2016.
“Ang ina nga operation is not administered, is not supervised sang office namon. Ang may diretso na sa pag-gamit is ang cooperative mismo. May ara na siya standing nga MOA or memorandum of agreement which stipulates nga ginatugyan sa kooperatiba ang pag-gamit na sang mga facilities in ways nga maka-profit sila sa ila economic gain, dugang sa income sang ila cooperative. Ang mga practice sang mga coop regarding sa sina nga project, ginagamit na nila kung kaisa ginapa-arkilahan nila, ginapakargahan sang mga kung ano da, kis-a mga kahoy, mga balas, bato”, suno kay Cabrales.
[sibwp_form id=1]