Patay ang amay nga si Ciceron Bautista sa pagmuno kag panglabo sa Hacienda Panaogao 2, Brgy. 4, Silay City Miyerkules sang gab-i.
Pilason ang anak ni Ciceron nga si Ronald kag isa pa ka lalaki nga si Andrew Mondragon. Ang suspek ginkilala kay Meljun Mediane.
Suno kay Lt. Colonel Mark Anthony Darroca, hepe sang Silay City PNP, nagkadto ang mag-amay nga Bautista sa balay sang suspek agud husayon ang ila away sang nagligad nga inadlaw.
Ang suspek may upod sa iya balay nga si Mondragon.
Nagkomprontahanay ang bata nga Bautista kag ang suspek gani ginbuno siya sini gamit ang kutsilyo. Nagtambag ang amay apang ini ang nabun-an sa tiyan nga gintunaan sang iya kamatayon.
Si Mondragon ang nagbulig man tambag apang ini ang nabun-an man ni Mediane sa palad.
Apang ang bata nga Bautista nakakita sang espading kag ginlabo man sini si Mediane sa nawala nga kamot.
Gindala sa Teresita Lopez Jalandoni Provincial Hospital ang suspek, si Ronald kag si Mondragon ang nangin outpatient naman.
Suno kay Darroca, ginpasakaan na sang kaso nga homicide kag frustrated homicide si Mediane.