May isa na naman ka spinner dolphin ang nasapwan nga patay sa higad sang baybayon sang Barangay Piapi sa Dumaguete City kaina sang aga. Gilayon nga ginpahibalo sang katapo sang Bantay Dagat ang natungdan nga mga ahensya sang gobyerno matapos makita sa higad sang baybay ang amo nga dolphin.
Antes sini may lima na tanan ka mga patay man nga dolphins ang nasapwan sa Bais City sa Negros Oriental. Ginahulat pa ang resulta sa necropsy nga ginpatigayon diri para matumod kun ano ang ginkamatay nila. Isa sa mga ginalantaw nga rason amo ang blasting ukon ang pagpalupok sang explosives sa dagat.