Isa ka 25 anyos nga babaye ang napatay bangud sang suspected human rabies. Sa record sang Provincial Health Office, ika apat na siya nga suspected human rabies death sa Negros Occidental.
Ang 25 anyos ang napatay sang Domingo, Mayo 25 sa Corazon Locsin Montelibano Memorial Regional Hospital.
Suno kay Dr Girlie Pinongan ang Provincial Health Officer, nakagtan sang ido sa bulan sang Marso sa Kabankalan City ang biktima. Dugang pa niya, sa Bacolod na naga tenir ang natungdan nga babaye.
Sa inisyal nga impormasyon wala sang history sang pag pabakuna kontra rabies ang 25 anyos suno kay Pinongan.
Nakitaan siya sang sintoma sang rabies kaangay sang hydrophobia, nag hilanat man siya suno kay Pinongan.
Ang recorded suspected human rabies death sa kada LGU ang makabig nga maka alarma suno sa PHO.
Damlag pa may gin-report na nga napatay bangud sang suspected human rabies sa Don Salvador Benedicto – 6 anyos nga bata nga lalaki, Hinoba-an – 72 anyos nga lolo kag sa Cauayan – 21 anyos nga babaye suno kay Pinongan.
Gina paandaman ang publiko kontra rabies labi na nga ini ang makamamatay.
“Once you have deaths sa rabies, alarming gid siya for our LGU. Sa aton LGU especially nga indi gid man dapat may ara kita rabies death. So gina warn, nga may mga amo ni nga incident, nga may makagat whatsoever, go to the nearest health facility. We do have animal bite centers man para sa aton nga vaccination. Kay this patient nga napatay, wala ni siya history of vaccination. Wala siya natagaan sang vaccine”, suno kay Pinongan.
Kun makagtan sang ido, kuring, ukon ano man nga sapat dapat mag bisita sa pinaka malapit nga bite center para mahatagan sang nagakaigo nga medical attention.