Natukod nga Investigation team nagahatag atensyon sa mga reklamo angut sa pagkuha sang komisyon sa mga benepisyaryo sang AICS kag AKAP sa Bacolod.
Antes pa man nag-byahe si Mayor Albee Benitez nag-issue na siya sang executive order angut sa pagtukod sang investigation team nga magatutok sa reklamo sang mga benepisyaryo sang AICS kag AKAP nga ginakuhaan sang komisyon ukon ginabuhinan ang ila ginabaton nga mga financial assistance.
Ginpahayag ni City Legal Officer Karol Joseph Chiu nga tuyo nila nga maka-porma sang proseso nga sarang makapaiway sang kasubong sang modus.
Ang team ang maga-pa gwa sang resulta sang imbestigasyon sa tion nga makabalik na sa siudad ang alkalde.
Nakalab-ot sa alkalde nga may mga benepisyaryo nga ginakuhaan sang komisyon ang ila ginabaton nga tig-P3,000 tubtob P10,000 nga financial assistance.
Iya man ginmanduan ang pamunuan sang DSSD nga masiguro nga ma-validate ang listahan sang mga benepisyaryo para masiguro nga lehitimo sila nga magabaton sang ayuda gikan sa gobyerno.