Nagapadayon ang kapulisan sa backtracking kag pag review sang mga CCTV footages agud matumod ang mga suspetsado sa pagpatay sa isa ka Indian national sa Purok Bayanihan, Barangay Villamonte, Bacolod City, kagab-i.
Sa inisyal nga impormasyon sang kapulisan, nagamaneho sang motorsiklo gikan sa merkado sang Barangay Montevista ang biktima nga ginkilala nga si alyas “Akashdeep” sang ginsundan ini sang duha ka suspetsado nga naga angkasanay sa motor.
Pag-abot sa Purok Bayanihan, gin-unahan ang riding in tandem ang biktima kag gintiro gamit ang wala pa ma matumod nga kalibre sang pusil.
Nakaangkon sang pilas sa ulo ang biktima nga gintunaan sang iya kamatayon.
Ginsiling ni Police Major Joeil Reclamado, commander sang Police Station 4 nga lima palang ka bulan nga naga-istar sa Bacolod City ang biktima.
Naga negosyo ang iya pamilya sa siudad paagi sa pagpa-utang, apang wala pa matumod kun direkta man nga nagapautang ang biktima.
Wala man sang may nadula sa mga gamit sang Indian national suno kay Reclamado.
Nagapangayo ang kapulisan sang bulig sa pamilya sang biktima agud mabuksan ang iya nga cellphone para makuhaan sang posible nga mga detalye antes siya gintiro.
Nagporma na sang isa ka Special Investigation Task Group ang Bacolod City Police Office agud matutukan ang amo nga kaso.
[sibwp_form id=1]