Gin-dismiss sa serbisyo ang pamuno sang Human Resource Department sang Negros Occidental matapos makit-an nga liable sa Opression, Conduct Prejudicial to the best interest of the Service, Grave Misconduct kag being Notoriously Undesirable.
Sa desisyon nga gin lagdaan ni Governor Eugenio Jose Lacson sa kaso ni Atty Anabelle Palic, sadtong Hunyo 17, nakasaad man nga nalakip sa pag dismiss sa iya gikan sa serbisyo ang accessory penalties kasubong sang cancellation of eligibility, perpetual disqualification from holding public office, pag bar sang pagkuha sang civil service examination kag forfeiture sang retirement benefits sandig man sa Section 57 (a) Rule 10 sang 2017 RACCS ukon ang Revised Rules on Administrative Cases in Civil Service.
Suno kay Atty Alberto Nellas, Jr., ang Provincial Legal Officer kag naga serbe man nga hearing officer, ang kaso kay Palic sadtong pang 2021 ang nag gikan sa mga reklamo sang job order workers, mga retirees kag isa ka empleyado. Suno kay Nellas nalakip sa basehan sang reklamo ang pag-require ni Palic sang iban pa gid ukon dugang nga requirements sa pila ka mga JO workers para makuha ang ila nga sweldo.
May isa ka empleyado nga nag reklamo nga wala ginkilala ni Palic ang iya nga leave sang tion sang pandemic.
May pila man ka retirees nga nagreklamo sang kabudlayan sa pag hatag sang clearance sa ila para sa ila nga retirement pay.
Ang mga reklamo ang gin-consolidate sang Progressive Alliance of Capitol Employees.
Nag-file sang Motion for Reconsideration si Palic kay Governor Lacson bilang disciplining authority sadtong June 30.
May 15 diyas suno kay Nellas para ma resolve ini. Kun indi man mangin paborable kay Palic ang desisyon, sarang siya mag-file sang Motion for Reconsideration sa Civil Service Commission.
Gintinguhaan sang Digicast Negros nga makuhaan sang iya nga bahin si Palic pero wala siya makasabat as of presstime.