Hemodialysis Center sa La Carlota City ang nagsira. Mga dialysis patient nabalaka kun ano ang matabo sa ila. Paathag sang probinsya, temporaryo lang ini.
Isa ka dialysis patient ang nagpadangat sang pagkabalaka matapos nga maabtan nga nagsirado ang hemodialysis center sang Don Salvador Benedicto Memorial District Hospital sa La Carlota City.
Suno sa iya, indi mahapos para sa parehos niya nga magsaylo-saylo sang dialysis center ilabi na nga ang iya mga dokumento ang yara sa amo nga ospital.
Wala man kuno sang may naga paathag sa ila kun ano ang natabo kag kun san-o mabalik ang operation ukon makabalik pa operate ang amo nga pasilidad.
Isa pa gid ka pasyente ang nagkabalaka man, masobra sila kuno sa 130 tanan ka mga pasyente ang naga pa dialysis sa amo nga pasilidad.
Paathag ni Provincial Administrator Rayfrando Diaz, sa pag inspeksyon sang Provincial Health Office, naga kinahanglan nga matinluan ang amo nga pasilidad.
Gani ginpakamaayo nila nga ipa refer anay ang mga pasyente sa iban na dialysis center samtang gina patinluan pa ang dialysis center.
Suno kay Diaz, kinahanglan anay nga masiguro nga matinluan ang pasilidad antes pabalikon ang mga pasyente para safe ini para sa ila.
As of press time wala pa makasabat ang Provincial Health Office kun san-o liwat mangin operational ang amo nga dialysis center.