Gin-inspeksyon sang katapo sang City Engineer’s Office ang nagapadayon nga construction sang Phase 1 sang Bacolod City Health Complex nga yara na karon sa 70 percent nahuman. Ginsiling ni City Health Officer, Dr. Carmela Gensoli nga sa Setyembre ginapaabot nila nga mangin operational na ang proyekto kag masuguran na nila ang pagsaylo sa bag-o nga building. Hulyo sang nagligad nga tuig sang ginsuguran ang proyekto. Kapin sa P220M ang ginpain nga pondo para sa health complex nga napahamtang sa Barangay 20.
Ang primary health care facility ang may yara sang dialysis center, clinics, birthing facility, physical therapy center, laboratories kag iban pa nga pasilidad nga ginakinahanglan sa pagpasanyog sang health services sang siudad. Sa tion nga makasaylo na ang daan nga mga health offices sa bag-o nga building, suguran naman sang siudad ang pagtukod sang building 2 sang medical complex.