Shadow

Hazardous materials sa asbestos roofing sa Burgos Market ginareklamo sang mga bumalakal kag vendors

Kun tan-awon daw ordinaryo lang nga panid sang semento ining nagkalabuka nga asbestos roofing nga nagalinapta sa sulod sang ginakaayo nga Burgos Public Market.

Pero lipod sa ihibalo sang pila ka mga trabahador nga peligroso sa ila ikaayong lawas ang kasubong nga hazardous materials nga ila ginahimos kag ginapangsulod lang sa sako.

Ang engineer nga si Edwin Acostan, isa man ka anay overseas Filipino worker sa Kuwait ang nabalaka bangud sang indi maayo nga disposal sang asbestos roofing gikan sa nakaayo nga atop sang merkado.

Bisan ang mga manugbaligya ang nabalaka man bangud malapit lang sa ila mga tapangko ang wala pa mahimos nga hazardous materials.

Suno kay Rommel Palalon, officer in charge sang Environment and Natural Resources Office, responsibilidad sang contractor ang pag secure sang ginakinahanglan nga permit kag mga protective equipment para sa disposal sang asbestos roofing.

Indi man pwede nga ihaboy ang hazardous material sa sanitary landfill suno kay Palalon nga pamuno man sang Department of Public Services.

May masobra na sa duha semana nga wala mahimos ang mga nabuka nga asbestos roofing sa sulod sang merkado.

Ang asbestos amo sadto ang ginagamit nga material sa mga construction site bangud sang thermal capacity sini. Ugaling ang asbestos nga isa ka fibrous hydrated mineral silicates ang carcinogenic ukon sarang maka tuga sang balatian nga cancer base man sa mga pagtuon.

Secured By miniOrangeSecured By miniOrange