Sa report sang Provincial Veterinary Office, naglab-ot sa P1,051,258.16 ang halit sa kasapatan sang mabunok nga ulan kag baha nga epekto ni bagyo Quinta sang Domingo.
Suno kay Dr. Renante Decena, sa nabaton nila nga report, may walo ka mga banwa kag siudad ang nagreport sang kahalitan sa ila nga mga kasapatan kag ini ang nagalakip sang banwa sang Hinoba-an, Isabela, Moises Padilla, Binalbagan, Valladolid, San Enrique, Bago City kag La Carlota City.
Nalakip sa mga kasapatan nga nagkalamatay amo ang free range chicken, pato, idik, inugbulang nga manok, kanding kag carabao kag ini tanan gikan sa backyard farm.
Sa partial report naman sang Office of the Provincial Agriculturist, may apat ka mga banwa ang nag-report sang kahalitan sa mga pananum.
Ang siudad sang Sipalay, halos P1.5 million nga balor sang halit sa humay ang gin report. P483,000 naman ang gin report nga damage sa high-value crops kag masobra sa P40,000 ang halit sa mais.
175 naman ka mga mangunguma ang nag report nga nahalitan ang ila nga pananum sa banwa sang Hinobaan.
P3.3 million ang balor sang halit sa humay sa tatlo ka mga barangay.
Halos P2.4 million pesos naman ang agricultural damage sa banwa sang Moises Padilla. P 2.2M diri ang balor sang halit sa 70 ka ektariya sang humayan.
May mga tubo kag humay naman sa banwa sang Isabela ang nahalitan.
“Naka insure man ni ang pila natun ka mangunguma sa crop insurance program upod sa aton nga mga municipal kag city agriculturist. Magapadangat na sila sang ila notice of loss for indemnity claims,” suno kay Armando Abano, senior agriculturist.