Naglab-ot sa walo ka oras ang nagluntad nga sunog sang kahapon sa downtown sang Bacolod; halit sang kalayo nagdangat sa 20 million pesos.
Nagsugod mga las otso y medya sang aga sa Jean’s Boutique sa may Luzuriaga Street sa Bacolod City kag nalab-ot ang katupad sini nga Wan Li Marketing.
Suno sa kay Bacolod City Fire Marshall, Chief Inspector Rodel Legaspi, napalong ang kalayo sa Jean’s Boutique mga las onse sang aga kag ang sa Wan Li Marketing naman las kwatro katorse sang hapon.
Dugang pa niya, ginbudlayan ang mga bombero lakip na ang mga fire volunteers sa pagpalong sang kalayo kay ang third floor sang Wan Li Marketing ang napuno sang mga bombilya, bags, habol, folding beds kag iban pa gid nga mga household items.
Sa bulig sang mga ladder sang Chamber kag Amity, nakahimo sila sang mga buho sa dingding sang third floor kag diri nila ginsulod ang nozzle sang mga hose kay indi sila sa gihapon maka penetrate sa building.
Ang kakulang sang ventilation kag ang tuman ka init, delikado para sa mga bombero ang pagsulod sa building.
Isa pa gid sa nagpadugay sa pagpalong sa kalayo kay ang aso gikan sa building ang tuman man ka sakit sa mata kag maisog ang baho.
Maswerte na lamang kag Domingo kag indi amo sina kadamo sang tawo kag bag-o lang gid naka bukas ang Jean’s Boutique samtang sarado naman ang Wan Li.
Gina usisa pa kun ano gid ang ginhalinan sang kalayo pero ang halit naglab-ot sa masobra sa bente milyones pesos.