City Legal Officer sang Bacolod naga-recommend sa pagtukod sang ordinansa para mapatpat ang mga penalidad sa mga nagapasulod sang gina-ban nga pork and pork meat products pati na mga buhi nga manok kag table eggs sa siudad.
Wala pa sang may napasaka nga kaso ukon napinahan humalin sang natukod ang Joint Task Force sang Negros Occidental kag Bacolod nga amo ang hugot nga nagabantay batuk sa pagsulod sang ginadumilian nga pork and pork meat products pati na buhi nga manok kag mga table eggs sa probinsya ilabi na sa siudad.
Suno kay City Legal Officer Romeo Carlos Ting, Jr., wala sang nagakaigo nga penalidad sa mga nagasupak sang natukod nga Executive Order nga natukod agud mapangapinan ang probinsya batuk sa avian flu kag african swine fever.
Gani gina-recommend niya ang pagdihon sang ordinansa agud mapatpat ang mga pina ilabi na sa mga nagapadayon pasulod sang banned products.
Natukiban nga ikaapat na nga na-intercept ang ang drayber sang van nga nagdala sang 240,000 ka bilog nga itlog nga wala sang nagakaigo nga dokumento sa Bredco port sang nagligad nga semana.
Ang kapin P1.4 million pesos nga balor sang table eggs ang ginpangsunog sang task force.
Nagapati si Ting nga magluwas sa confiscation sang mga banned items kinahanglan ang mas mabaskog nga penalidad para mapunggan ang pagsulod sang mga ginadumilian nga produkto sa probinsya kag sa siudad.