Shadow

Gunman nga wala maigu ang iya target, pilason matapos nga gin pulihan

Rennier Araco Jr photo

Pilason ang wala pa mkailal-an nga gunman matapos siya nga gin tiro, gin buno kag gin pulihan sang iya target kag iban pa nga mga nakakita sa pag paniro, sa Barangay Bagacay sa Dumaguete City kagab-i.

Sa imbestigasyon sang Dumaguete City PNP, naga pungko lang sa isa ka kalan-an sa amo nga barangay ang 45 anyos nga si Sandy Tinguha sang siya ang gin tiro sang gunman.

Wala maigu si Tinguha gani iya gin habuy sang bangko ang suspek kag nag palagyo.

Sang wala maigo sang bala si Tinguha, sunod nga gin lagas sang gunman ang iya isa pa ka target nga amo si Jason Ong kag gin tiro sang makapila ka beses samtang iya ini gina laot.

Wala niya man maigu si Ong.

Sang makita sang mga yara sa palibot ang pag paniro sang gunman, may isa ka nakakita sang insidente nga nag haboy sang bato sa gunman kag iya man ini ginbuno sang kitchen knife agud mag untat na sa pag paniro.

Ila nakuha ang armas sang suspek kag si Ong nga gin target sang gunman ang nagtiro sa suspetsado sa iya sini liog.

Ginpulihan pa sang iban pa nga bystander ang gunman.

Na recover sang kapulisan ang lima tanan ka basiyo sang 45 caliber pistol. Nakuha man sang kapulisan ang duha ka armas sang suspek.

Ginabulong karon sa ospital ang gunman kag ang PNP ang naga usisa pa kun ano ang iya nga motibo sa pag paniro.

Secured By miniOrangeSecured By miniOrange