Isa ka hearing ang ginpatawag sang Sangguniang Panlungsod sang Bacolod para sa panawagan sang Bacolod Employers Union nga bulig sa tunga sang negatibo nga epekto sag COVID-19 pandemic sa ila negosyo.
Ang BEU ang isa ka grupo sag mga micro, small and medium enterprises sa siudad.
Suno sa presidente sang grupo nga si John Anthony Ledesma, madamo sang ila mga miembro ang tuman nga naapektuhan sa ginapatuman nga community quarantine bangud indi pa makabalik sa normal ang lakat sang negosyo samtang yara pa ang pandemic.
Sila ang nagsulat sa SP para hinyuon ang pagpasar sang resolusyon nga nagapatuman sang 50 tubtub 60 porsiento nga adjustment ukon discount sa ila ginabayaran nga building rental fees tubtub nga makabalik sa normal ang ekonomiya.
Nagapangayo man sila sang discount ukon waiver sang balayran sa pagawad sang business permit sa siudad para sa madason nga tuig ilabi na ang mga tuman nga naapektuhan sang pandemic.
Nagapangabay man sila sa Energy Regulatory Commission nga himuon nga residential rate ang ginabayaran nila nga commercial rate sa ila electric bill.
Ginpahayag ni Ledesma nga wala pa sang solusyon nga nadangatan ang hearing bangud wala pa ini matapos gani nagpatawag sang isa pa gid ka hearing ang SP sa madason nga semana.