Gobernador Eugenio Jose Lacson ang maga suporta kay Vice President Leni Robredo sa maabot nga Mayo nga piniliay.
Ginsiling sang gobernador sa katapo sang media sini nga Lunes, nga nangin hayag naman ang iya nga desisyon nga siya ang para kay VP Leni.
Humalin pa sang gin-pahayag ni San Carlos City Mayor Renato Gustilo nga siya ang naga suporta kay Robredo, suno kay Lacson iya ini nga ginakumpirma sa mga naga pamangkot sa iya nga siya ang para kay VP Leni.
Sa Marso 11, natalana ang campaign rally ni Robredo kag sang iya partido sa probinsya, suno kay Lacson siya ang maga upod diri kun ma imbitahan.
Wala pa sang pat-od nga venue sa amo nga rally. 28 ukon mayoriya man sang mga alkalde sa Negros Occidental ang para kay Ferdinand Marcos, Jr-Sara Duterte tandem.
Suno kay Lacson iya nga gina respeto ini kag indi na siya mag tinguha nga mag kumbinsi pa sa iban sa ila nga mag kambyo sang ila nga pensar.
Indi man siya makasabat kun sin-o ang choice sang mga alkalde nga wala nag-upod sa BBM-Sara nga pagtililipon.
Kun ngaa si VP Leni ang iya nga suportahan suno kay Lacson, siya ang maga boto sa kandidato nga iya masaligan.
“Why am I for Leni? When we face our ballots on May 9, there’s only one question that you should ask yourself: it’s who do you trust. And you don’t even have to explain why you trust a person. That’s the main reason why I am voting for any candidate for that matter”, suno kay Lacson.
Naga hulat pa ang gobernador sang pagsinapol sang iya partido Nationalist People’s Coalition bahin sa bise presidente nga suportahan.
Si vice presidential candidate Tito Sotto ang chairman sang NPC.
Pero may pila ka mga katapo sang partido suno sa iya nga naga siling nga ang amo nga pagpapili wala nag agi sa consultation.