Wala pa na sugilanunan sang probinsya kag contractor ang bahin sa ginakinahanglan nga re-bidding angut sa tuyo nga pagsaylo sang administration center sang probinsya sa Talisay City.
Suno kay Governor Eugenio Jose Lacson wala pa naka istorya ang probinsya sa Dynamic Builders and Construction Company Inc., ang nag daog nga contractor, karon nga gina require ang rebidding sang GPPB ukon Government Procurement Policy Board sa malapit isa ka bilyon ka pesos nga proyekto, kun igasaylo sa Talisay City ang administration center.
Kinahangalan ang pagsugot sang contractor labi na nga may kontrata na sila sa probinsya sa pagpatukod sang administration center sa duta man sang gobyerno probinsyal sa Aguinaldo Street sa Bacolod City.
Kun indi magsugot ang contractor suno kay Lacson maga pabilin ang proyekto sa Bacolod.
Ginaduso sang probinsya ang bag-o nga admin center sa Talisay bangud sang mga kahigayunan sini kasubong sa patag sang negosyo kag ekonomiya.