Bisan pa nga nagadiutay na ang mga katigulangan sa isa ka komunidad sa Sitio Cabagtasan, Barangay Codcod siudad sang San Carlos, nagapabilin sa gihapon sa ila komunidad ang tradisyonal nga mga pamaagi sang pagpanguma, pagpangisda, kag ang tikog weaving.
Ang tikog weaving ang isa mga palangabuhian sang mga lokal sang Sitio Cabagtasan humalin pa sang una.
Tikog, ukon reed grass ang ginagamit sang mga taga Cabagtasan sa pag-ubra sang mga banig, bags, table runners, kag iban pa.
Ini ang natukiban sang San Carlos LGU matapos nga nagpatuman sila sang Cultural Heritage Mapping sa Sitio Cabagtasan kag Magon-on Falls sa Brgy Codcod.
Suno sa nagapamuno sang Cabagtasan Tribal Council nga si Leonisa Impil, ila man sa gihapon ginagamit ang lingwahe nga Binukid sa lugar tubtob sa karun.
Gin-preserve man sang komunidad ang “sagyap” ukon sinang-una nga pamaagi sang pagpanakop sang isda sa ila mga katubigan.
Sandig man sa mapping sang siudad, ginatudlo gid sang mga katigulangan sa ila mga kabataan kag kaapohan ang ila nga tradition, rason nga tubtob sa karun nagapabilin pa ang ini nga ginawi.
Antes makakadto ang isa ka bisita sa Sitio Cabagtasan, kinahanglan man nga magkuha siya anay sang permiso sa Tribal Council. Ini ang pamaagi sang komunidad agud mapabilin nila ang ila nga mga indigenous practices.
Matapos ang mapping, Iga-consolidate na sang siudad ang tanan nga impormasyon nga ila nakuha agud makadihon sang mga programa para sa pagpangapin sang natural kag cultural heritage sang Barangay Codcod.
[sibwp_form id=1]