Nangin kampyon sa PONY International West Zone Softball World Series sa California ang 12-under Team Sagay City matapos ginpierde ang Redlands, California sa score nga 9-1, sa championship game sang 2026 PONY International West Zone Softball World Series sa California, USA.
Wala kaagi pierde ang Sagay City sa bug-os nga series halin sa elimination round, semi-finals kag sa finals.
Ang nagkampeon nga team ginabug-usan sang mga estudyante gikan sa Jose B. Puey Sr. Elementary School kag Sagay National High School, nga nagpakita sang mabaskog kag epektibo nga depensa batok sa sobra napulo ka mga team nga naghalin sa nagkalain-lain nga pungsod.
Ang 12 and under world title ang ikaduha nga kadalag-an nga nadala pauli sang Team Sagay City sa PONY Softball World Series, kasunod sang pagkampeon man sang ila 14-under (14U) team sa McAllen, Texas.
Samtang gin pakigbahin ni Bacolod City Mayor Greg Gasataya ang kadalag-an sang softball girls team sang Bacolod City National High School sa score nga 7-1 batok sa Southwest Region sang Texas sa Junior League Softball World Series sa Kirkland, Washington.
Subong nga adlaw ang ila hampang batok sa Canada sa Everest Park Diamond Pitch.
Nagapasalamat ang alkalde sa Team sa paghatag sang bugal indi lang sa Bacolod kundi sa bilog nga pungsod.
[sibwp_form id=1]