Sa pihak sang ginaduso nga duha tubtob lima ka pesos nga saka sa plete sa bug-os nga Pilipinas sang grupo nga MANIBELA, ginklaro sang Bacolod Alliance for Commuters, Operators, and Drivers ukon BACOD-Manibela, nga indi sila mag-ugyon sa amo nga kawsa.
Ginsiling ni Rudy Catedral, pamuno sang BACOD-Manibela nga nakighinun-anon na siya sa lider sang nasyonal nga grupo nga magapabilin nga wala sang saka sa plete sa siudad sang Bacolod.
Suno sa iya, indi naga kaangay nga ipapas-an sa commuters ang problema sa liwat nga pagsaka sang presyo sang gatong bangud magatuga ini sang domino effect.
Indi man puwede nga magsaka ang sukot sa plete bangud wala man sang may nakita nga pagsaka sa sweldo sang mga mamumugon dugang ni Catedral.
Isa ka dako nga pagpanghangkat sa sektor sang transportasyon ang asod-asod nga pagsaka sang presyo sang gatong, rason nga panawagan sang BACOD-Manibela sa gobyerno nga liwat sila mahatagan sang subsidy.
Pangabay man ni Catedral sa mga gasolinahan amo nga padayunon ang paghatag sa mga drayber sang discount sa gatong.
Martes sang aga, may 50 ka mga asawa sang mga drayber sa idalum sang BACOD-Manibela ang nakabaton sang tag 10,000 pesos nga Special Livelihood Program ukon SLP.
May masobra sa 800 ka drayber ang grupo nga BACOD-Manibela, nga sa karun naga-isahanon nga grupo sang mga unconsolidated jeepney sa siudad.
[sibwp_form id=1]