May temporary nga overflow nga sarang liwat maagyan sa Sitio Kabayabasan, Barangay Montilla sa Moises Padilla bangud sang pag binuligay sang mga pumuluyo kag lokal nga gobyerno sang Moises Padilla.
Indi madali-dali tukod liwat sang naguba nga overflow bangud tuman ka dako sang kantidad nga kinahanglanon kag malawigan pa ini.
Isa ini sa mga taytay kag overflow nga nahalitan sang Bagyo Tino sang nagligad nga tuig.
Gani samtang ginahulat nga mabalik ang alagyan, nag binuligay anay ang tanan para may maagyan ang pumuluyo kag ang mga salakyan.
Ginpahulam ni Vice Mayor Felix Mathias Segundo “Pimpoy” Yulo, III ang iya personal nga backhoe agud mapahapos kag mapadasig ang trabaho.
Pero bangud temporaryo lamang ini nga alagyan, gina abisuhan lang ang mga motorista kag pumuluyo nga maghalong lang sa pagtabok kun mabaskog ang ulan.
Ang Moises Padilla ang isa sa mga LGU sa Negros Occidental nga lubos nga na apektohan sa pag igo sang bagyo Tino sa probinsya.