Gin-post sang official Facebook page sang Barangay Malaunay sa Valencia, Negros Oriental ang video nga kuha sang mag-asawa nga Engr. Amiel kag Amje Atoy.
Makita sa video ang apat tanan ka mga Visayan Tarictic Hornbill.
Isa ka sahi sang pispis nga makit-an lamang sa mga isla sang Panay kag Negros kag karon ginakabig nga endangered.
Buot silingon lapit na lang sila maubos bangud sang pagkadula sang ila nga ilistaran sa kagulangan, hunting kag illegal wildlife trade.
Ini ang rason kun ngaa may mga organisasyon nga naga bulig padamo sa ila.
Ginkalipay sang mag-asawa ang ila ginakabig close encounter sa sini nga mga tarictic nga komportable nga naga hulon sa isa ka taytay.
Tumalagsahon lang ang ini nga hitabo kay diutay na lang katama ang ini nga mga pispis.
Panawagan sang barangay sa mga pumuluyo nga indi pagdakpon ukon paghilabtan ang mga ini kag buligan nga ma proteksyonan ang mga endangered nga mga pispis.
Ang madakpan nga naga dakop, baligya ukon naga hilabot sa mga tarictic ang sarang makasuhan sang pagsupak sang Republic Act No. 9147 ukon ang Wildlife Resources Conservation and Protection Act.
[sibwp_form id=1]