Gobernador ang nagsapol sa mga alkalde sang lugar nga apektado sang bulkan Kanlaon.
Ginkasugtan nga papulion ang mga evacuees nga wala nasakop sa 6 kilometer danger zone.
Kaina sang hapon nagsapol si Governor Eugenio Jose Lacson, kanday La Castellana Mayor Rhummyla Nicor Mangilimutan, La Carlota City Mayor, Rex Jalandoon kag tiglawas sang Bago City nga si Dr Merijene Ortizo nga pamuno sang Disaster Risk Reduction Management Office.
Suno kay Dr Ortizo, ginkasugtan nga maga decamp ukon papulion ang mga evacuees nga wala nasakop sa 6 kilometer extended danger zone.
Sa Bago City suno sa iya may mga evacuees sila nga indi sakop sang 6kilometer danger zone pero kay tungod sang epekto sang ash fall sa ila nga lugar kag sang makusog nga sulfuric smell sila ang gin-evacuate.
Suno kay Ortizo bwas, kadungan man sa mga evacuees sang La Castellana nga indi man sakop sang 6 kilometer danger zone maga decamp sila.
Ginsiling man ni Mayor Jalandoon nga ang probinsya ang maga bulig sa pagkaon kasubong man sa relocation sa ulihi sang mga evacuees.
Ginsiling ni Governor Lacson nga ang posibilidad sa pag relocate sang yadtong yara sa 4 kilometer permanent danger zone ang luyag niya nga talakayon sa mga alkalde kag kun mahimo malakip man ang yadtong yara sa 6 kilometer danger zone.
Mangin trabahuso ang pag evacuate sang mga apektado sa tagsa ka tion nga mag lupok ukon may threat gikan sa bulkan.
Para kay Lacson ang pag relocate kun masarangan man lamang sang natungdan nga LGUs ang mangin bentaha man sa mga LGU.
Kun may duta man lamang nga itanyag ang mga LGU sarang man maka bulig ang probinsya sa iban nga pamaagi.
Karon nag untat na ang bulig sang probinsya paagi sa pag supply sang pagkaon sa mga evacuees kag ang LGU naman ang maga gasto para diri.
Pero, sa ulihi kun kinahanglanon, maga bulig sa gihapon ang probinsya sa mga LGU.