Nagapatigayon sa karon sang pagpangusisa ang Provincial Health Office kag Department of Health Region 6 sa gin-report nga Lambda variant sang Covid-19 sa Negros Occidental.
Suno kay Provincial Administrator Rayfrando Diaz, nakabaton ang probinsya sang report gikan sa University of the Philippines-Philippine Genome Center nga may lambda variant nga na detect sa probinsya.
Pero madamo sang mga palamangkutanon angut sa amo nga kaso suno kay Diaz. Ang natungdan nga isa ka 35 anyos kag sadto nagabusong ang taga banwa sang valladolid. Ang mga close contacts sini ang damlag pa nag negatibo na sa Covid–19. Wala man sang history of travel ang 35 anyos.
Gin re-swab na siya kaina sang aga, matapos mabaton sang kahapon sang probinsya ang amo nga report. Sa datus sang probinsya, nagbun-ag sang iya nga bata sa Corazon Locsin Montelibano Memorial Regional Hospital ang 35 anyos kag siya ang nagpositibo sa Covid-19 sang July 22.
Nag quarantine ini sa EB Magalona Healing Facility. Na-discharge siya sa facility sadtong Agosto 6. Ginpadala naman ang iya nga specimen sa Philippine Genome Center sang Agosto 3.
Suno kay Negros Occidental Governor Eugenio Jose Lacson, bisan gani ang alkalde sang amo nga banwa ang wala naga ugyon sa amo nga report.
Wala sang dapat nga i-panic ang mga pumuluyo sa tunga sang amo nga report kay sa bisan ano nga variant magapabilin sa gihapon ang protocol nga ginapatuman sa karon.
Ang Lambda variant ang gikan sa Peru kag ginasiling nga mas makalalaton kag vaccine resistant kun ipaangid sa original virus.
Kahapon gin-report sang DOH ang pinaka una nga kaso sang Lambda variant sa Pilipinas.
“Based on DOH report, but the mayor concerned doesn’t want to agree on that report. But as I said, if it’s there, it’s there. Let’s just continue to be careful and practice whatever it takes. Time to time again, we repeat the minimum health standards. There is no strategy that is being introduced. Get tested, contact traced and treat,” suno kay Lacson.