Shadow

Ginpapanaugan sang korte sang TRO pagpatuman sang joint venture agreement sang Bacolod City Water District kag PrimeWater

Ginpapanaugan sang korte sang temporary restraining order ang pagpatuman sang joint venture agreement sang Bacolod City Water District kag PrimeWater Infrastructure Corporation bangud sang reklamo nga disbentaha ini sa konsumedor kag may iregularidad sa transaksyon.

Bente ka adlaw nga TRO ang ginpapanaug ni Regional Trial Court Branch 45 Judge Phoebe Gargantiel-Balbin para ipaiway anay ang pagpatuman sang joint venture agreement nga ginlagdaan sang BACIWA kag PrimeWater.

Ini ang ginmando sang korte sa gin-file nga complaint with declaratory relief and declaration of nullity ni Bacolod Councilor Wilson Gamboa Jr. kag pila ka mga konsumedor nga may pangabay sang preliminary injunction kag TRO sa korte.

Gina-alegar sang grupo ni Gamboa nga wala nag-agi sa nagakaigo nga proseso ang paglagda sang amo nga kasugtanan kag disbentaha para sa mga konsumedor ang amo nga proyekto.

Isa ka hearing ang gintalana sang korte sa maabot nga Nobyembre 9 para sa application for preliminary injunction sang kampo ni Gamboa.

Base sa mando sang korte, tuyo lamang sini nga pamati-an ang magtimbang nga bahin angut sa ginsudlan nga kasugtanan kag wala na nagakasayuran nga may nakita na ini nga iregularidad sa transaksyon.

Damlag pa, ginpahayag sang baciwa nga tinutuyo sang kasugtanan nga mapaayo pa gid ang serbisyo sa mga konsumedor pinaagi sa pagdala sang estable kag nagakaigo nga water supply.

Secured By miniOrangeSecured By miniOrange