Gin-lift na sang Regional Task Force Kanlaon ang pagdumili sa pagsulod sa 6 kilometer extended danger zone. Office of the Civil Defense ang liwat nagaduso sang istrikto nga monitoring sa border control.
Liwat naman nga bukas ang 6am to 4pm nga window para sa mga mangunguma kag heads of the family agudto nga ma atender nila ang ila nga mga pananum, kasapatan kag mabisita ang ila nga mga balay nga sakop sang 6 km extended danger zone.
Ini kasunod sang paglupok sang bulkan Kanlaon sang Mayo 13 kun sa diin temporaryo ang gindumili ang pagsulod diri.
Paathag ni Office of the Civil Defense NIR Director, Donato Sermeno, III, indi nila luyag nga magkumpiyansa ang mga pumuluyo bangud indi mapaktan ang activity sang bulkan.
Sang April 8 nga paglupok sang bulkan ang pyro clastic density currents tubtob lamang sa 800 meters sa slope sang bulkan, sang Mayo 13 naglab-ot na ang PDC sa 2 kilometers.
Sa gihapon paathag ni Sermeno base man sa PHIVOLCS nga pahayag, indi pa yadto ang major erruption gani mahimo may magaabot pa gid nga paglupok.
Sa pihak nga bahin sa pagsinapol sang Provincial Disaster Risk Reduction Management Council, gintalakay ang mga proposed permanent evacuation center kag resettlement sites sa mga apektado nga pumuluyo sang Bulkan Kanlaon.
Ini ang subject sa evaluation kag approval suno kay Sermeno.
Ang La Castellana may site sa Brgy Talaptap kag Lalagsan.
Ang La Carlota ginpapangita liwat sang site bangud indi pasado ang gina propose sa Brgy Haguimit, San Miguel kag La Granja.
Ang Bago City naman may yara sang kaugalingon nga duta pero ginalantaw prone ang lugar sa tsunami kun may matabo.
Suno kay Sermeno may isa pa gid ka proposed area ang Bago. Nagdugang diri ang San Carlos City nga may proposed site sa Brgy Prosperidad para sa mga pumuluyo sini nga mahimo ma apektuhan gikan sa Brgy Codcod.