Muddy stream flow ang nag apekto sang mga waterways sa La Castellana.
Paathag ni Mari-Andylene Quintia ang resident volcanologist sang PHIVOLCS sa La Carlota Observatory, ini ang tuga sang pycroclastic density current ukon PDC nga gin buga sang bulkan Kanlaon matapos nga mag lupok ini sang Mayo 13 kag ang pag ulan-ulan sa nagliligad nga mga inadlaw.
Mga duha ka kilometro suno kay Quintia ang nalab-utan sang PDC sa mga slopes sang bulkan.
Sa karon sa ila nabaton nga report mga suba lang sa La Castellana ang na apektuhan sang muddy stream flow.
“Possible nga mag ka muddy stream flow tungod nga may ara kita sang pag-ulan the past days kag kakatapos lang sang aton eruption, may ara siya nga mga PDC or pyroclastic density currents nga nag abot up to 2 kilometers down slope sang aton bulkan and ini siya pwede ni siya mag generate sang mga lahar kun ma trigger sang rainfall. Tungod nga kagab-i halos sagunson man ang ulan”, suno kay Quintia.
Naga paandam ang Office of the Civil Defense nga ini ang naga tuga sang risgo sa ikaayong lawas kag sa palibot.
Gani gina abisuhan ang mga pumuluo nga ang tubig ilimnon ang pabukalan.
Likawan man ang mag kaon sang isda gikan sa mga apektado nga mga suba.
Ang mga naga puyo naman malapit sa suba ang dapat nga mag-aligmat labi na kun magsaka ang tubig ukon ang water level.
Sa pihak nga bahin, gina sulit sang Provincial Health Office ang pahanumdom sa publiko nga kun may ash fall dapat mag gamit sang mask.
Suno kay Dr Girlie Pinongan, ang Provincial Health Officer, sa ila nga pagbisita sa mga apektado nga lugar sakop sang Bago kag La Carlota ila nakit-an nga may mga pumuluyo nga wala naga gamit sang face mask.
Suno kay Pinongan, ila nga gin-remind ang mga health officers nga dapat ipatuman ang pag gamit sang face mask bangud mabudlay nga mag masakit ang mga natungdan sang respiratory diseases.