Siudad sang bacolod ang magapahanugot sang mga vendors sa pagbaligya sa Bacolod public plaza kag kasubong man mga manugbaligya sang palupok sini nga bulan sang paskwa.
Suno kay Bacolod Mayor Evelio Leonardia, luyag niya nga hatagan sang kahigayunan ang mga vendors nga makabenta sini nga bulan agud makabawi sa epekto sang pandemya sini nga tuig.
Pero dapat estrikto nga sundun sang mga vendors ang minimum health protocols para malikawan ang paglapta sang COVID-19.
Ginpangayuan man sang siudad sang pahanugot ang Department of Interior and Local Government para masiguro nga wala sang pagsupak sa NIATF guidelines.
Mahimo sa gihapon nga makabaligya ang mga firecracker vendors sa reclamation area basta ila lang pagasundun man ang iban pa nga mga requirements sang pnp may angut sa pagbaligya sang palupok.
Wala pa karon sang pat-od nga petsa kun san-o na makasugod sa pagbaligya ang mga vendors pero ginalauman nga matigayon ini antes sa adlaw sang paskwa tubtub sa New Year.