Iban pa nga mga frontliners nga nagatrabaho sa gobyerno kag essential sectors ang sarang na mabakunahan para sa Covid-19 sa madason nga bulan.
Ginpahayag ni Dr. Marie Jocelyn Te sang Department of Health regional office nga target sang DOH nga mabakunahan na sa madason nga bulan ang mga persona nga yara sa idalum sang A4 priority list.
Sila ang mga frontline personnel sa gobyerno kag mga essential sectors lakip na ang mga uniformed personnel kag katapo sang media.
Pero nagahulat pa sa karon ang DOH regional office sang supply sang bakuna nga magaabot gikan sa national office.
Padayon ang pagbakuna sang mga local government units sa mga yara sa A1 tubtub A3 ukon mga health care workers, senior citizens kag may co-morbidities.
Sa siudad sang Bacolod, nagapadayon ang pagbakuna sa mga malls pero para lamang ini sa mga may schedule na sang ila second dose sang bakuna.
Ini bangud wala pa sang may nabaton nga bag-o nga supply sang bakuna gikan sa DOH.