Ginpa untat na sang lokal nga pangulohan sang Talisay ang ginapatigayon nga clearing operations sa dalan sa Sitio Campuestohan, Barangay Cabatangan para nga usisaon.
Makit-an sa post ni Rhoderick Samonte sa iya social media page ang ritrato sang isa ka backhoe nga nagapanghawan sang duta sa paghimu sang isa ka alagyan sa amo nga lugar nga nasakupan sang Northern Negros Natural Park nga isa ka protected area.
Nagapanawagan si Samonte sa gobyerno nga usisaon ini kun bala may paglapas sa kasuguan.
Ginpahayag naman ni Community Environment and Natural Resources officer Engineer Joan Nathaniel Gerangaya nga iya gilayon ginpahibalo ang lokal nga pangulohan sang Talisay sa nagaluntad nga clearing operations.
Ginpa untat ini kahapon kag may gintalana nga hearing buas nga adlaw ang CENRO, LGU kag ang nagapatigayon sang clearing operations agud mausisa kun bala may nagakaigo ini nga permit.