Ginsugdan sang Bacolod Traffic and Transport Management Department ang pag patuman sang “No Left Turn” sa intersection sang Galo-Lopez Jaena Streets paagi sa pagbutang sang barikada sang Domingo nga adlaw.
Bangud sa mga komento kag reklamo sang mga motorista nga nagalabay sa amo nga dalan, may gin-bag-o ang BTTMD sa amo nga experimento.
Ang halin sa Megaworld, pwede na nga maka diretso sa Galo Street bangud ginbuksan na ini sang BTTMD. May mga traffic enforcer nga naga guide sa mga motorista.
Nagapabilin sa gihapon ang experimental re-rerouting sang BTTMD nga no left turn.
Gani ang mga gikan sa Megaworld nga indi mag diretso sa Galo ang maga liko na patuo, rekta sa Bangga Patyo kag didto na magliko sa BFP nga naga serbe u-turn slot agud maka diretso sa Lopez Jaena Street ukon mag liko naman patuo sa Burgos Street.
Ginsiling ni Atty. Reuben Sabig, pamuno sang BTTMD nga ini ang isa ka experimental lamang nga tikang agud mapangitaan sang solusyon ang problema sa traffic sa amo nga dalan.
Kada las nueve sang aga ginabutangan sang BTTMD sang barikada ang amo nga dalan kag kwaon naman ini las kuatro sang hapon, ilabi na kon rush hour.
Suno kay City Administrator Atty. Mark Steven Mayo, nga magapadayon ang amo nga experimento tubtob nga may makita na nga solusyon ang BTTMD.
Bukas man ang siudad nga ibalik sa daan nga dalagan sang ruta ang natungdan nga mga dalanon.
Nagapangayo man sang pag-instindi ang siudad sa mga motorista samtang ginapatuman pa sang BTTMD ang experimental re-routing.*
[sibwp_form id=1]