Patay ang anay barangay kagawad matapos gintiro sang wala pa makilal-an nga suspek sa gwa sang iya balay sa Hacienda Cabayao, Barangay San Pablo sa banwa sang Manapla, Miyerkules sang aga.
Naglunsar ang kapulisan sang hot-pursuit operation batuk sa nakapalagyo nga suspek.
Base sa imbestigasyon, nagpadulong sa puluy-an sang biktima nga si alyas “Pablo”, 54-anyos, ang suspek nga gin-alegar nagapangita sang iya nadula nga karbaw.
Suno sa saksi, naga-istorya ang suspek kag ang anay kagawad sang gulpi lang gin-gabot sang suspek ang iya pusil kag gintiro ang biktima sa ulo kag lawas.
Nagsulod pa ang suspek sa balay sang biktima kag ginpahog ang iya pamilya.
Nalagyo ang suspek padulong sa nabukid nga bahin sang lugar.
Nakuha sa crime scene ang 10 tanan ka empty shells sang caliber .45 pistol kag isa ka live ammunition.
Wala pa mahibaluan ang motibo sa pagpatay sa anay kagawad.