Pamuno sang Committee on Transportation sang konseho nagapati nga indi lubos nga maka apekto sa siudad ang pag-untat byahe sang pila ka mga transport organization sa Lunes.
Indi mag upod ang katapo sang SSTONE ukon Sentrong Samahan ng mga Tsuper at Operators Negros kag Federation of Bacolod City Drivers Association ukon FEBACDA sa panawagan sang ila mga kaupod sa transport sector nga mag untat biyahe sa Lunes.
Gani nagapati man si Councilor Al Victor Espino, pamuno sang Committee on Transportation and Traffic sang konseho nga indi man lubos maapektuhan ang siudad sa ginaplano nga strike.
Luwas sa mayorya sang katapo sang grupo sang traditional jeepney operators kag drivers, maga biyahe man ang kapin 500 ka mga modernized jeepney.
Ang Bacolod Alliance of Commuters, Operators and Drivers upod sa United Negros Drivers and Operators Center ukon UNDOC kag Negros Bacolod Transport Coalition nagapanawagan nga ma-abolish ang City Ordinance 966 nga naga adopt sang Local Public Transport Route Plan.
Sila ang maga rally sa atubang sang Bacolod City Government Center sa Lunes sang aga kabahin sang paglunsar sang pag untat byahe