Nakabaton sang bomb threat ang Doña Montserrat Lopez Memorial High School sa Silay City, paagi sa tawag sa landline sang eskwelahan, Martes nga adlaw.
Bangud sang bomb threat, nag-suspend sang klase ang principal sang buluthuan para man sa safety sang mga estudyante, manunudlo kag staff.
Ginsiling ni Police Lt. Col. Mark Anthony Darroca, hepe sang Silay PNP, nagresponde kag nagpatigayon sila sang initial visual check kag sang makita nga safe na ang lugar, nagtawag pa gid sila sang EOD team halin sa regional office agud mag-clearing sa bilog nga eskwelahan.
Wala sang may nakita nga IED ukon improvised explosive device sa buluthuan.
Nagpakig-angut na ang Silay PNP sa Philippine Long Distance Telephone Company ukon PLDT agud ma-trace kun diin naghalin ang tawag.
Bangud wala man sang aktwal nga bomba, ginalantaw sang kapulisan nga ang motibo sang caller amo ang magtuga lamang sang kakugmat.
Ikaduha na ini nga insidente sang bomb threat sa Silay. Sadtong Nobyembre, nakabaton man ang Silay Institute sang bomb threat, suno pa kay Darroca.*